गुल्मी । मर्निङ वाकमा निस्केकी गुल्मीकी एक महिला घर नफर्किएपछि खोजतलासका क्रममा अनकन्टार भिरमा मृत फेला परेकी छन् ।
धुर्कोट गाउँपालिका–६ रजस्थल घर भई हाल छोराको पढाइका सिलसिलामा तम्घास बस्दै आएकी ३८ वर्षीया तारा बस्नेत रेसुङ्गा नगरपालिका–३ भाडगाउँस्थित माइतीघरमा आएका बेला मृत फेला परेकी हुन् ।
उनी हिजो बिहान करिब ६ बजे सधैँझैँ माइतीघरबाट मर्निङ वाकमा निस्किएकी थिइन् । तर, लामो समयसम्म घर नफर्किएपछि परिवारले जिल्ला प्रहरी कार्यालय गुल्मीमा खोजतलासका लागि जाहेरी दिएको रेसुङ्गा नगरपालिका–३ का वडाध्यक्ष बाबुराम खत्रीले बताए ।
वडाध्यक्ष खत्रीका अनुसार आज बिहान उपल्लो भाडगाउँ र तल्लो भाडगाउँको बीचमा रहेको अनकन्टार भिरको खोँचमा कागहरू झुम्मिएको देखेपछि शङ्का लागेर ड्रोनको सहायताले नियाल्दा महिलाको शव देखिएको थियो ।
त्यसपछि नेपाली सेना, सशस्त्र प्रहरी र नेपाल प्रहरीको टोली घटनास्थल पुगेको थियो । जिल्ला प्रहरी कार्यालय गुल्मीका प्रवक्ता प्रहरी नायब उपरीक्षक (डीएसपी) वीरेन्द्र विश्वकर्माका अनुसार तीनवटै सुरक्षा निकायको संयुक्त प्रयासमा शवलाई भिरबाट बाहिर निकालिएको हो । उक्त शव बेपत्ता तारा बस्नेतकै भएको उनले पुष्टि गरेका छन् ।
धुर्कोट गाउँपालिकाका नगर प्रहरी भुवन बस्नेतले मृतक आफ्नी आन्टी भएको बताए । उनका अनुसार ताराको एक छोरा छन् । छोरालाई पढाउन उनी तम्घासमा बस्दै आएकी थिइन् । विद्यालय बिदा भएकाले केही समयका लागि माइतीघर भाडगाउँ पुगेकी थिइन् ।
ताराका श्रीमान् बासबहादुर बस्नेत दसैँ मनाउन विदेशबाट घर आएका थिए । दसैँ मनाएर दुबई फर्किएको एक साता पनि नबित्दै परिवारमा यो दुःखद घटना भएको भुवनले बताए । घटनाको कारण भने खुल्न बाँकी छ ।
