भैरहवा । महन्थ ठाकुर नेतृत्वको लोकतान्त्रिक समाजवादी पार्टी नेपाल (लोसपा) निकट भातृसंगठन लोकतान्त्रिक विद्यार्थी संघ, रुपन्देहीको अध्यक्षमा अमन बानियाँ चयन भएका छन् ।
संगठन विस्तारको क्रममा फागुन ४ गतेको लोकतान्त्रिक विद्यार्थी संघको बैठकले जिल्लास्तरीय भेलाबाट अमन बानियाँको अध्यक्षतमा १७ सदस्यीय जिल्ला कार्यसमिति सर्वसम्मत चयन गरेको हो । संगठनको उपाध्यक्षमा भूपेन्द्र भट्ट, सचिवमा रोनक श्रीवास्तब (अभिलाष) र कोषाध्यक्षमा सुशिला यादव सर्वसम्मत चयन भएको विद्यार्थी संगठनका केन्द्रिय सचिव जैनुद्दिन देवानले जानकारी दिए ।
विद्यार्थी संघ आउँदो चैत्र ५ गते हुने स्वतन्त्र विद्यार्थी युनियन (स्ववियु) निर्वाचनका लागि पूर्ण रूपमा सक्रिय भएको छ। निर्वाचनलाई व्यवस्थित ढंगले अगाडि बढाउन संगठनले अनुशासन, परिचालन, आर्थिक र प्रचार–प्रसार समितिहरू गठन गरेको छ । संगठन जिल्ला सदस्यहरुमा रम्भा गुप्ता, अनदीप यादव, कमरान अली, मुन्नी जैसवाल, रामनाथ गुप्ता, ओक्कार युनुस, सुदामा थारु, राजन कोहार, प्रविणकुमार चौधरी थारु, मनिष हरिजन, फूलचन्द्र हरिजन, इन्द्रमणि यादव र विजयकुमार बरई सर्वसम्मत चयन भएको स्वतन्त्र विद्यार्थी युनियन (स्ववियू) निर्वाचनको अनुशासन समिति सदस्य समेत रहेका देवानले बताए ।
संगठनले पार्टीका नीति, कार्यक्रम र विद्यार्थीको हकहीतमा काम गर्ने जनाएको छ । नयाँ कार्यसमितिले आगामी स्ववियु निर्वाचन लक्षित कार्यक्रमलाई कलेजहरुमा प्रभावकारी ढंगले अघि बढाउने र संगठनको विजयका लागि आफ्ना एजेण्डा विद्यार्थीहरु समक्ष लैजाने बताएको छ ।
नवनिर्वाचित अध्यक्ष बानियाँले मुलुकको विद्यार्थी आन्दोलनलाई थप उचाईमा पुर्याउन र विद्यार्थी हकहीतका लागि संगठनले जिल्लाभर अभियानमूलक कार्यक्रम गर्ने बताए । उनले शैक्षिक सुधार र विद्यार्थीमैत्री शैक्षिक वातावरण सिर्जना गर्न आफूहरुले पहलकदमी गर्ने जनाए । जिल्लाका हरेक स्कूल, प्लस टु, क्याम्पसहरुमा संगठन निर्माण गरी बलियो विद्यार्थी संगठन बनाउने आफूहरुको योजना रहेको बताए ।
