भैरहवा । भैरहवा भन्सार कार्यालयको नेतृत्व र सशस्त्र प्रहरी बल २७ नं. हे. क्वाको सहकार्यमा भन्सार छली अवैध रुपमा संचित गरिएको चिनी बरामद गरिएको छ ।
पछिल्लो समय भन्सारले सूचनाको आधारमा निरन्तर सफलता हासिल गर्दे आइरहेको छ । सूचनालाई गम्भिरताका साथ लिदै लाखौ मुल्यको अवैध सामान भन्सार प्रमुख नारद गौतमको सक्रियतामा नियन्त्रणमा लिइएकाे छ ।
बिहीबार दुगौलिया नाका अन्तर्गत पर्ने मायादेवी–३ बाट १४७ बोरा अर्थात ७ हजार ३ सय ५० किलो अवैध चिनी बरामद गरिएको हो । २ वटा घरमा अवैध रुपमा भित्रयाएर संचित गरिएको भन्ने सूचना भन्सार प्रमुखलाई आएपछि सोहीको आधारमा भन्सार कार्यालय र सशस्त्र प्रहरी उपरिक्षक आनन्द थापाको कमाण्डमा गएको टोली दुईवटै घरमा राखिएकाे चिनी नियन्त्रणमा लिएको हो । चिनी राखेको केही दुरीमै प्रहरी चौकी दुर्गौलिया रहेपनि त्यसबारे सुइको पाएका थिएनन ।
मर्चवार क्षेत्र तस्करहरुको रोजाईको क्षेत्र भएपनि आहिले भने तस्कर न्यूनिकरणका लागि टोली परिचालित छ । शनिबार मर्चवारमा तस्करहरुले भन्सारको गस्तीटोलीलाई घेरामा लिई गाडीसहितको तस्करीको सामान भगाए पछि सुरक्षा निकाय सतर्क रही काम गर्दै आएको छ । चिनी, मटर र स्टीम चामल भारीमात्रामा तस्करी हुने गरेको थिए । शनिबारको घटनापछि प्रमुख जिल्ला अधिकारी गणेश अर्यालको नेतृत्वमा सुरक्षा निकायहरु पनि बेला बेलामा सम्भावित क्षेत्रको निरिक्षणमा निस्की रहेका छन ।
मंगलबार प्रजिअकै नेतृत्वमा मिनि ट्रक सहित ८४ बोरा मटर नियन्त्रणमा लिएको थियो, व्यापक तस्करी भइरहेको छ भन्ने आधारमा बुधबार प्रजिअ अर्यालसँगै, सुरक्षा निकायका प्रमुख नेपाल प्रहरीका एसपी रंजित सिंह राठौर, सशस्त्र प्रहरीका एसपी आनन्द थापा सहित मर्चवार क्षेत्रमा रहेका प्रहरी युनिटहरु विभिन्न नाकाहरुको निरिक्षण गरेका थिए । सो टोलीले समेत अवैध रुपमा भित्रिएको मटर चिनी लगायतका सामान नियन्त्रणमा लिएको थियो ।
यस्तै शनिबारको घटनामा संलग्न केही व्यक्तिलाई समेत प्रजिअ अर्यालको नेतृत्वमा नियन्त्रणमा लिएको छ । मंगलबार राती प्रजिअ अर्याललाई मर्चवारमा तस्करको गाडी भगाउने र हुलहुज्जत गर्ने व्यक्तिहरु एक होटलमा बसेका छन भन्ने विशेष सूचना आएको थियो, सोही आधारमा प्रजिअ अर्याल सहितको टोलीले मोतिपुर एक होटलबाट ४ जनालाई नियन्त्रणमा लिएको बताए । उनीहरुलाइृ म्याद थप गरि अनुसन्धान भइरहेको छ, अघि सोमबार मिनि ट्रक पनि नियन्त्रणमा आएको छ, घटनामा संलग्न केही अझै फरार रहेकोले तिनीहरु खोजीकार्य भइरहेको प्रजिअ अर्यालले बताए ।
